«Арман қала – Астана!» атты тақырыпта сурет салу сағаты

6 – шілде Астана күніне орай Балалар мен жасөспірімдер кітапханасында «Арман қала – Астана!» атты тақырыпта сурет салу сағаты өтті. Ұрпақты ұлтжандылыққа тәрбиелеу, Елбасының ұстанымдық саясатын балаларға үлгі ету, Астана, ЭКСПО-2017 көрмесі туралы мәлімет беру мақсатында ұйымдастырылған іс-шараға №3 мектептің жазғы сауықтыру лагерінің оқушылары қатысып, өздерінің шығармашылық қабілеттерін көрсетті. Олар Астана қаласының символдары – «Бәйтерек» пен «Хан шатырды», жайқалған жасыл желек пен ашық аспанды, Ақорда мен әсем ғимараттардың суреттерін салды.
Кітапхананың оқу залында «Күн шуақты-Астана!» атты арнайы кітап көрмесі ұйымдастырылды. Кітап көрмесіндегі ұсынылған әдебиеттер оқырмандарды Астана тарихымен таныстыра отырып, елордамыздың даму жолдары мен тарихи кезеңдерін насихаттау арқылы Астананың абыройын асқақтату және ғасырлық дәстүрді сабақтастырған Астананың бүгінгі келбетінен мол мағлұмат берді. Тақырыпқа сай безендірілген көрмеден: елорданың өткені мен бүгінінен сыр шертетін туындылар, Астананың қазіргі келбетін баяндайтын кітаптар орын алды. Кітапхана қорынан алынған Н.Ә.Назарбаевтың «Еуразияның жүрегінде», «Астана хикаялары», «Астана – жыр құшағында, Ән қанатында», «Астана – күн шуағы» атты фото-альбом кітаптарымен кітапханамыздың белсенді оқырмандары жақынырақ танысты.
Іс-шараның соңыда Оқырмандарға «Астана жайлы 20 дерек» атты бейнеролик көрсетілді.